Tiranë/ Djali i pronarit të ‘Lajthizës’ me armë pa leje në restorantin e VIP-ave ‘Savoy Garden’, plagos gjatë festës një vajzë e dy vëllezërit e saj! Në kërkim nga policia! 2 të tjerë në pranga

 Një festë e orëve të vona në një nga restorantet më luksoze në rrugën e Kavajës, brenda kompleksit të banimit “Deligjorgji” në Tiranë, përfundoi me 3 të plagosur me armë zjarri, anëtarë të së njëjtës familje, motra dhe vëllezërit.

Në mesin e të ftuarve VIP në festën e një rrethi shoqëror e familjar, djali i biznesmenit Hajri Elezaj, i njohur si pronar i ujit “Lajthiza”, Edison Elezaj 32 vjeç mbante me vetë një armë pa leje, të cilën e shkrepi pas mesnate duke lënë të plagosur 3 familjarët, një vajzë 36 vjeç binjake me vëllain dhe më i vogli mes tyre, 34 vjeç, të cilët u paraqitën rreth orës 01:35 në një spital privat në Tiranë me dëmtime. Vëllezërit kanë lënë spitalin pasi kanë marrë mjekim, ndërsa vajza 36-vjecare – thotë policia – është ende nën kujdesin e mjekëve, por jashtë rrezikut për jetën.

“Rreth orës 01:30 të mëngjesit të sotëm, ata kanë qenë duke festuar së bashku me persona të tjerë nga rrethi i tyre shoqëror dhe familjar, në një lokal në Rrugën e Kavajës”, thotë policia.

Rrethanat e ngjarjes mbeten të paqarta, apo se përse djali i biznesmenit Elezaj duhej të festonte me armë në brez, por policia tha në një njoftim paraprak se 32-vjeçari “dyshohet se aksidentalisht bëri një shkrepje të pavullnetshme”. Më tej, në një njoftim të dytë zyrtar, blutë e Tiranës rënduan situatën dhe thanë se e shpallën në kërkim 32-vjeçarin për veprën penale, “plagosje e rëndë me dashje”

Dy të tjerë, pjesë e festës shoqërore, u arrestuan nga policia, pasi i morën armën djalit të biznesmenit dhe e fshehën për të penguar zbulimin e së vërtetës. Nga këqyrja e kamerave të sigurisë në restorant, policia arriti të gjejë armën dhe të identifikojë personat që e morën atë pas të shtënave Arjan Dushaj, 38 vjeç, dhe Dardan Zalli, 35 vjeç, të dy banues në Tiranë.

Festa zhvillohej në “Savoy Garden” një nga restorantet me luks në Tiranë, i cili frekuentohet nga shumë personazhe VIP. Ai është hapur në vitin 2022, dhe sipas regjistrit tregtar është në bashkëpronësi nga Elira Ndreaj me 51% të aksioneve dhe nga Ermir Ndreaj me 41% të aksioneve, i njohur si pronar i Cinco Cavallit.

Dardan Zalli dhe Arjan Dushaj janë arrestuar nga policia e Tiranës, pasi plagosjes me armë zjarri gjatë një feste familjare të 3 të afërmve nga Edison Elezaj, djali i pronarit të ‘Lajthizës’ Hajri Elezajt. Ngjarja ndodhi në një restorant luksoz ‘Savoy Garde’ te kompleksi ‘Deliorgji’, ndërsa dy personat u arrestuan pasi ndihmuan 32-vjeçarin të fshihte armën.

‘Gjithashtu, gjatë kryerjes së veprimeve procedurale, si dhe këqyrjes së kamerave të sigurisë, është bërë e mundur gjetja e armës së zjarrit pistoletë TT, e cila dyshohet se është përdorur gjatë ngjarjes. Pas kryerjes së krimit nga Edison Elezaj , dy të arrestuarit, i kanë marrë armën e zjarrit dhe më pas e kanë fshehur atë, me qëllim pengimin e zbulimit të veprës penale dhe të autorit të saj.’- njofton policia.

Njoftimi i policisë

Nëvijim të informacionit paraprak të dhënë mëngjesin e sotëm, ju informojmë se:

Në vijim të veprimeve të shpejta hetimore, nga  Sektori për Hetimin e Krimeve të Rënda në DVP Tiranë, është bërë i mundur dokumentimi i plotë i autorësisë së ngjarjes, dhe si rezultat:

- u shpall në kërkim shtetasi E. E., 32 vjeç, për veprën penale "Plagosja e rëndë me dashje", parashikuar nga neni 88/2 i Kodit Penal;

- u arrestuan shtetasit A. D., 38 vjeç, dhe D. Z., 35 vjeç, të dy banues në Tiranë, për veprën penale "Veprime që pengojnë zbulimin e së vërtetës", kryer në bashkëpunim, parashikuar nga neni 301/25 i Kodit Penal.

Gjithashtu, gjatë kryerjes së veprimeve procedurale, si dhe këqyrjes së kamerave të sigurisë, është bërë e mundur gjetja e armës së zjarrit pistoletë TT, e cila dyshohet se është përdorur gjatë ngjarjes.

Pas kryerjes së krimit nga shtetasi E. E., dy të arrestuarit, i kanë marrë armën e zjarrit dhe më pas e kanë fshehur atë, me qëllim pengimin e zbulimit të veprës penale dhe të autorit të saj.

Materialet i kaluan Prokurorisë.